السعد جي المساجد معا وقت الاذان والشقا كثر المعاصي وتأخير الصلاه !

[سواها قلبي]

لا تقصر في التغاضي ولا ترضى الهوان
ولا تواخـذ صاحـبٍ زل عنـد اول خطـاه

ومـد كـفـك للمواجـيب مافـي الكـون فـان
لا تعـودهـا علـى الشــح يـامـال الغنـاه

ولا تردا فـي رفيـقٍ غــدت عشـره ثمـان
بـار به محزمه والوقت من جـوره وطـاه

وانتبـه مـن قولـة انــي سمعته مـن فلان
والله انها من خـراب الـزمان ومـن بـلاه

واخـذ بابـور الصـداقـه إلـى بــر الامان
الخيـانــه تغـرقـه والـوفـا طــوق النجـاه

ونظرتك في حال الاصحاب تعطيك البيـان
حالهـم يكشـف لـك السر والبير وغطـاه

صـاحبٍ مـا يلزم الــدين يالـلـه المستعان
لـو يـحصّـل مـا تـمـنـاه عنده مـا هنـآه

وصـاحبٍ يـذكـر عـطايـاه ويحــد اللسان
احسن انـه مـا عطا شيء يوم الله عطـاه

وصاحبٍ يوعد ويخلف الى صك البطان
ودك انك باتجاهٍ ومثله باتجاه

وصاحبٍ مـالـه بـنــي عـم لـو عنـده ضمان
تــدركــه صـلفــات الأيـام وتبـيّـح خـفـاه

وصاحبٍ مـا ينـتـعيـن إلى مـال الـزمـان
يستـوي عنــد الــرفـاقـه مـمـاتـه والحيـاه

من تعلم من ظروفه ودورات الزمان
يدري ان العمر لو طال ياصل منتهاه

الحياه لقلب الانسان زينه وافتتان
وكل ما حصل من الرزق فيها ما كفاه

الصبر والحلم تأديب والضيق امتحان
والهوا والنفس تنساق في كل اتجاه

لاتحسب ان كثرة المال تدخلك الجِنان
دام منت تراقب الله وتدور رضاه

السعد جي المساجد معا وقت الاذان
والشقا كثر المعاصي وتأخير الصلاه !