[سواها قلبي]

المشاركة الأصلية كتبت بواسطة غنا

رائع اخي عبرة مؤثرة

بنت عمي تقولين عبرة مؤثرة اشقصدج وصلتلج سالفتي انتي لو شايفتني جان ما قلتي اخي عبرة مؤثرة جان قلتي فشلة اقولها له مابي اطول عليج بالسالفة

دخلت بيت اختي عازمتني عالعشا طبعا مو كرم منها هههههههههههه وصلتها لبيتها وزل السانها وقالتي انزل تعش معانا الظاهر تحسفت لما قالتلي وانا يوعان حيل وبروح للبر للربع دشيت وتعشينا وخلصنا مابي اطول عليج بالسالفة

يابتلي الجاي بالغوري مو بالمطاره هذا انا احبه من شفته حاشتني دوخه ويتني النومه انا تخرعت عبالي اني حامل دوخه وشعور بالنوم امبيه مابي اطول عليه بالسالفة

قمنا انسولف ونضحك واشرب جاي وخدامة داشة وطالعة علينا بالفواكه والحلى شنو هالزين وتذكر الربع لما اروح لهم كله شغل وسب ومايعجبهم الشغل هالقواطي فرق وايد هونت وقلت ماني رايح للربع المهم مابي اطول عليج السالفة

اهي افتح السالفة وجان زين مافتحتها يابت سيرة القصة اللي انتي معجبه فيها وقالت وربي القصة وايد حلوه اللي انت دازها لي سالتها اي وحده فيهم وانا فيني النوم قالتلي سالفة الخياط وحفيده الله لا يوفق حفيده ولا يبارج بالخياط ولا اب حكمته راح اتعرفين بنت عمي ليش دعيت عليه مابي اطول عليج السالفة

اشلون تذكرت اختي سالفة الخياط الله لا يوفقه ولا يوفق حفيده ازراري اللي ابدشاشتي انقطع قامت ويابت عدة الخياطه قوطي حلي ومصدي قديم محتفظه فيه تذكار مال عمة اخت ام رفيجة الوالدة بالرضاعة من خالتها مرت ابوها يعني من 300 سنة مابي ادش ابتفاصيل العايلة عشان ما اطول عليج بالسالفة


اختي خذت دشاشتي اتخيط الزرار وانا قاعد ابفنيله وصروالي الطويل تراني مؤدب طويل مو اقصير وكنت حذر حيل خايف اعيالها يصوروني وينزلونه باليوتوب الزهيوي له قرنان اشتشعار وانا كل شعري قام يشتشعر الخطر كلبوهم واقفين حتى شعر حواجبي واقفين كلش ولا سمعتي مابي اطول عليج السالفة

للاسف كأن اقورني الاستشعاريه خونت فيني الزهيوي له قرنان استشعار ويعلمونه بالخطر وانا من كثر هالشعر خونو فيني الظاهر ماكو سيرفس ابيت اختي المهم مابي اطول عليج السالفة


المهم انا الحين نسيت شنو السالفة اللي انا قاعد اقولها لج دقيقة غنا خنقرا ردي من الاول عشان اتذكر السالفة

اي قريت العنوان وطلع عن الخياط وحفيده الله لا يبارج فيهم ولا ابحكمته مابي اطول عليج بالسالفة


اختي واهي اتسلوف خذيت عدة الخياطة وفيها ابر ما اقدر احصي لج عددهم يمكنهم مليون نسمه من الابر المهم مابي اطول عليج بالسالفة

قلت لختي الحين ابطبق سالفة الخياط وحيفده الله لا يوفقهم ولا يبارج فيهم ابطبقها بولدج ولدها بسم الله عليه عمره ثلاث سنوات ونص اخذت المقص وابره وسويت نفسي اخيط ماعندي اعمامة شسويت انا لفيت غترتي على راسي صارت جنها اعمامة سيد بس واهو يطالعني وقطيت المقص عالارض واختي تضحك وغزيت الابرة بعماتي الله لا يبارج بالخياط ولا ابحفيده المهم مابي اطول عليج بالسافة


ما تحرك ولد اختي ولا فهم شقصد مو ذكي مثل حفيد الخياط الله لا يبارج بالخياط ولا ابحفيده واختي تضحك وخذيت المقص مرة ثانية وحذفته عالارض وقزيت ابره ثانية بعمامتي وهم ولد اختي ساكت ويطالعني واختي ميتة من الضحك خذيت االمقص وقطيته عالارض واخذت ابرة ثالثة وغزيتها يم الثنين اللي اب راسي المهم ما اطول عليج بالسالفة

الابر اللي عند ختي خصلوا شكيتتهم كلبوهم على راسي تقريبا 500 الف ابرة صار راسي جنه قنفذ طلبنا من الجيران جم ابرة لعل وعسى يسالني ولد اختي مثل حفيد الخياط الله لا يبارج في الخياط ولا ابحفيده اختي تضحك وتقولي طالع ويهك بالجامة التفلت عالجامة وشفت ويهي عبالي برنامج من حياة الشعوب طالع بالتلفزيون اثاريه انا المهم مابي اطول عليج بالسالفة

دق علي واحد من الربع تلفون وينك تأخرت وانا اكلمه اشتغلت الحكمة مع ولد اختي الله لا يبارج لا بالخياط ولا ابحفيده ولا ابرفيجي اللي اتصل علي المهم مابي اطول عليج بالسالفة

انا خابر الغترة اللي لافها على راسي مثل العمامة لونها ابيض وعليها الابر شقلب لوها الى بيج وفي مثل الصليب من جدام ولا ابره موجودة انا عبالي رقوني بالدرجة وصرت رئيس سيد المهم ما اطول عليج بالسالفة

وانا اتكلم بالتلفون قام ولد اختي واخذ اطول ابره بالقوطي وياني من وراي وعثر بنعاله وقزها بالعمامة ودشت ابراسي ومن قوة العوار ملت عاليسار وطق راسي بالجامة ودشت جم ابره من هالابر اللي بالعمامة ابراسي الله لا يوفق هالخياط وحفيده المهم ما اطول عليج بالسالفة

طلع اللون البيج لفاف وخيطو راسي والصليب هذا اللزاق الزبدة ولد اختي فهم السالفة غلط عبالها لعبة مثل السهم لازم يحوش النقطة الحمرا مع ان ماكو لو احمر على راسي جان عذرته ما اطول عليج بالسالفة

قلت حق اختي دخلوه معهد او حطوله مدرس وانتي تقولين

المشاركة الأصلية كتبت بواسطة غنا

عبرة مؤثرة

الحين عزيني انا وبعدين قولي عبرة مؤثره مع انها مو عبرة ابره مؤثرة