ما كل منهو يلبس البشت رجال
 

احيان اهني صاحب المال بالمال
واحيان اهني صاحب الفقر فقره

واحيان اكشخ والبس شماغ وعقال
واحيان اسير ولا على الراس غتره

الناس فيها هم يا طيب الفال
خذ لك من ايامك وانا خوك عبره

ترى أختلاف الحال حالن بعد حال
يعطيك فالدنيا مع الناس خبره

كم عاش فالدنيـا فقيـر من المال
ما فاد غير ونعـم حتـى بقبـره

وكم ولد لاش عاش في بارد ضلال
ما فاد شي ومات زولـه وذكـره

والوقت نفسه مـا تغيـر ولا زال
يوم وسنه والشهر هو نفس شهره

بس البلاء بنفوسنا صابها هبال
نركض بهالدنيا على غير دبره

بعنا الصبر من شان تحقيق الامال
واثر الامل مربوط في طول صبره

ومجملات الهرج قلنا وذا قـال
في رجل ما يسوى لتعظيم قدره

ما كل منهو يلبس البشت رجال
يبرك ويشتال الثقيلـه بظهـره

فيا هيه ياللي غرك الوقت تختـال
(كلن يعيش بحسب رايه وفكـره)

كتبتها من طيب مدري من هبـال
وقفلتها يوم القلـم جـف حبـره