منتدى زين فور يو - كنت قايم ابروح للدوام واذا بزميلي مرسل لي رساله

موسى البنغالي وصحن الفول*

قبل 5 اشهر تقريبا كان الجو بارد في الرياض كنت قايم ابروح للدوام واذا بزميلي مرسل لي رساله يا بوفلان وانت جاي *جب معك فطور*قلت خل امر الفوال اللي قريب من الدوام واجيب لهم فطور

المهم وصلت الفوال واذا فيه زحمه وطابور لكن يمشي بسرعه صفيت معهم وقعدت انتظر دوري علشان اطلب من الكاشير وانا واقف في السرا واتصفح الجوال دخل عامل صغير لابس كاب يتراوح عمره من 20 - 22 سنه واتجه مباشره للكاشير السوري واحنا مستغربين ليش ما يصف معنا سرا .

المهم ارتفع صوت الكاشير وهو يقول ما اقدر ما اقدر ما يجي عندها تكلمت انا وقلت انت ماتفهم حمار 😤 ارجع ارجع ورا والبنقالي يطالعني واعتقد ما فهم كلامي . رفعت صوتي 📣 ))) وقلت يالله انقلع ورا امسك سرا وأشر له بيدي ورا ورا والبنقالي يناظرني وساكت ثم انصرف .

وكملنا السرا ويوم وصل دوري وطلبت قعدت اسولف مع الكاشير السوري قلت ياخي فعلا ناس ما تستحي يشوف العالم صافه ويبي يآخذ قبلنا قال الكاشيرلا انت فاهم خطأ ❗ قلت وشلووون

قال الكاشير هو جاي يسألني يقول ممكن آخذ فول بريال قلت ماعندنا تسعيرة فول بريال اقل تسعيره ب 3 ريال قال البنقالي طيب ما فيه مشكله "انا اعطي 3 ريال حق 3 يوم وحط لي بريال انا فلوس شويا قلت لا مايصير المحل مسعروبعدها انت تكلمت ورجعته ورا .

الراوي التفت بعدها بسرعه ادوره واطلع برا وادوره في البقاله وانا اردد *لا حول ولا قوة الا بالله* .
واسأل اللي في الشارع عنه قالوا ما نعرفه .

المهم ضاق صدري عليه انه ما يملك قيمة الفطور وكيف انا نهرته وزجرته وسط الحضور ولم يرد علي بكلمه الا انه سكت وانصرف رحت للمكتب وافطرنا ووالله مع كل لقمه اشوف البنقالي قدامي وان اللقمه اتغصص فيها ثم قمت .! استغربوا اخوياي وشبلاك افطر قلت لا شبعت الحمد لله .

رجعت للمحل وقلت وين البنقالي ؟ قالوا ما ندري ما رجع وبعد بحث مكثف لقيت راعي المغسله يقول بابا انت تبي موسى قلت من موسى ؟ قال البنقالي اللي في الفوال اليوم الصباح اللي انت سوي مشكل معه .

قلت ايه وينه ؟ قال هو ما يجي كل يوم هنا ممكن عشره يوم او 15 يوم يجي مره ثانيه لانه يشتغل في صيانه الحديقه اللي عند الجامع قلت خلاص ابجي بعدين اشوفه وما ارتاحت نفسي صرت امر يوميا وانا جاي للدوام ابحث عنه وبعد عشر ايام واروح انتظر بدري عند الحديقه ويوم جت الساعه 7 الا والسياره توقف وينزل منها 4 عمال وموسى معهم واركض له موسى موسى والتفت يناظرني ومستغرب واسلم عليه واقول وين انت ياموسى انا يدور عليك عشر ايام ناظرني وهو مندهش شكله ما عرفني قلت انا اللي مشكله معك في فوال قبل عشر ايام ابتسم وطبطب على كتفي *وانا اللي ادخل يدي في جيبي واطلع خمسين ريال*💵

قلت خذ هذي ياموسى بس ما فيه زعلان حاول يرجعها مع استحياء ورفضت وقلت تعال معي للفوال وقلت للكاشير هذا فطوره علي متى ما جاك تعطيه اللي يبي والحساب عندي فرح موسى وشكرني واحسست اني رديت له اعتباره وكرامته .

وبعد تقريبا شهر مريت البوفيه علشان اعطيهم حسابهم قال الكاشير خل الحساب علينا *قلت* لا يارجال والله ما يحاسب الا انا كم بس ؟ قال حسابه 15 ريال هو وخويه جو تقريبا 3 مرات يطلبون صحن فول واحد ب 3 ريال واثنين شاي وبعدها ماعاد جاء موسى *استغربت*

*وانتظرت موعد حضورهم للحديقه ويوم جت السيارة وينزل منها 4 عمال تقريبا نفس اللي شفتهم عدا موسى مهوب معهم* واسألهم وين موسى ؟ التفتوا لبعض وسكتوا 😔 *قلت* فيه مشكله ؟ وين موسى ؟
قال واحد منهم موسى موت قبل اسبوع صار حادث دهس ودخل المستشفى 4 ايام ثم توفي *عندها نزل الخبر على مثل الصاعقه * وارجع في طريقي والقى راعي المغسله قلت دريت ان موسى مات قال ايه وانا اعرف موسى هو من نفس منطقتي وقريتي ونسولف عن موسى قال :

*موسى توفي ابوه وعمره 12 سنه.وتوفيت امه وهو عمره 16 سنه وتركوا له ثلاث اخوان عايشين عند عمتهم .* وموسى لمدة 18 شهر و هو *يحول راتبه كامل 400 ريال* ما ينقص ريال لعمته واخوانه .

*قلت* : وهو من وين ياكل ؟ قال : يشتغل غسيل سياره تنظيف بيت اي شيء ويكفيه اكله وشربه .
عندها استحقرت نفسي وعرفت ليش كان يحاول في الكاشير انه يفطر ب ريال؛ علشان يوفر لاخوانه وعمته*بعدها جمعت لي مبلغ ووصلناه لعمته واخوانه لعلي اكفر عن خطأي تجاه اخي موسى.*

والان انا في رمضان ومع كل سجده اشوف صورة موسى امامي *و والله اني تندمت اشد الندم* اني صرخت في وجهه ولم يرد علي احتراماً او خوفاً مني وعاهدت نفسي اني امسك نفسي ولساني عن الناس ولا اجرح او احتقر احد .

🍃فَلَا تَغُرَّنَّكُمُ الْحَيَاةُ الدُّنْيَا وَلَا يَغُرَّنَّكُمْ بِاللَّهِ الْغَرُورُ🍃