يقول الشاعر#

حنا بها الدنيا سوات السبابيح
أما سبحنا صح ..وألا غرقنا

أحد(ن) يعوم ويأخذ شوي ويطيح
وأحد(ن) وصل بر الأمان وسبقنا

الشعر به حكمة وللنفس ترويح
ويالله عسانا كان قلنا صدقنا

الحر يفهم يوم نعطيه تلميح
والصنف الآخر يجهل اللي طرقنا

العمر يذبل يالوجيه المفاليح
ولابد مايابس ويسقط ورقنا

لاتشتكي من ضيم الأقدار وتصيح
مادامها في دبرة اللي خلقنا

والقبر حفره والنصايب صلافيح
والدور لو يبطي علينا لحقنا

قدمك تقافت بالرجال الطحاطيح
لا تحسبنا من بلاهم عتقنا

أوضاعنا تحتاج توبه وتصليح
توبة نصوح إن كان ربي رزقنا